كوباية شاي
ابص قدامي ازاي
والريح تملي بتبعدني
ف ايدي كوباية شاي
ريحتها لسة بتجلدني
سكرها بيداري جروحي
نعناعها ياما استناكي
يتدلدق الحزن ف روحي
ويقولي لازم انساكي
سهران لوحدي باكلمها
عن كل ضحكة ضحكناها
ولما صوتي بيألمها
بلاقي صورتك جواها
ناقص على غيابك شفطة
خايف اقايس و اشربها
ولما ف الليل اتغطى
احلامي تعلن اضرابها
الحِمل
الحِمل على كتفك تقل
رجليك تغوص ف الارض لكن
ممنوع تقول انك بتتمنى التعب
عن كل حاجة بتتسئل
و الخوف فى قلبك لسه ساكن
مفضلش فيك غير حلم من ضله اترعب
يطعن ف روحك حلم كنت مصدقه
خايف تفوق خايف كمان لتحققه
خايف تكون وقت اللقا من غير ايدين
الناس يشوفوا الجرح فى عينيك يهربوا
تنده و تصرخ مستحيل هيقربوا
الكون بحاله ملخصينه ف ضحكتين
عكاز رحيلي
غريب و عايز حضنك الدافي
والشمس نورها كان تملي حزين
والحلم كان احمال على كتافي
جايلك و ماشي من سنين و سنين
باب الحياة قدامي كان مقفول
وف قلبي شايل حلم نفسه يعيش
بانده عليكي مهما جرحي يطول
بانده عليكي ليه مابتجاوبيش
عكاز رحيلي ف غربتي.. انتي
ضحكة دموعي و سكتي ..انتي
بحري و سفينتي و صرختي ..انتي
دمي اللي سايل ع الحجر ..انتي
ريحة النجوم نبض الشجر.. انتي
حتى الهروب وقت الخطر ..انتي
صوتي و سكوتي و غنوتي ..انتي
فيكي اللي فاضل لسه من روحي
و انا من بعيد واقف و مستني
مستني تيجي و تلمسي جروحي
يمكن معاكي تبتدي تغني
يا كل شيء ممكن يطمني
قوليلي ليه في البرد سايباني
لو كل خطوة هتبعدك عني
ازاي شفايفي هتبتسم تاني
عكاز رحيلي ف غربتي ..انتي
ضحكة دموعي و سكتي ..انتي
بحري و سفينتي و صرختي ..انتي
كل اللي فاضل م الحنان ..انتي
رعشة ايدي من زمان ..انتي
خايف عليكي و خوفي كان ..انتي
صوتي و سكوتي و غنوتي ..انتي
مليون فراشة
فى القهوه كان فيه قطة بالاعبها و انا قاعد وحيد
على قد ما شفت الحنان ف عينيها شفتك من بعيد
شفت ف عينيكى الدنيا لسه ملونه
و شفتنى و انا لسه قادر ابتسم
و طيور بتعلن بالغنا عن حبنا
ايدى فى ايديكى و حلم بينا بيترسم
البحر كان ف عينيكى بيضم النجوم
و الشمس كانت بتواعدنى ف كل يوم
مليون فراشه فوق شفايفك شفتها
معرفش ايه خلاني اقولك انى خايف وقتها
نخلق وطن
لازم ندور ع الطوفان
يمكن لو الكون اتمحى
نخلق وطن مافهوش حيطان
مافهوش قلوب متجرحة
نخلق وطن
مافهوش خريف مافهوش عبيد
ولا ليل مخيف ولا شيء بعيد
مافهوش بشر تقدر تخون
فيه كل ايد بتضم ايد
فيه الحنان جوه العيون
وردة امل متفتحة
آخر نقطة شمس
كنت ميت غصب عني
من تابوتي طلعتلك
قلبى كان رافض يغني
من وراه جيت قولتلك
شمس غير الشمس ديه
بين عيونك متداريه
كل ما ألقى الليل قصادي
الحيطان بتدوس عليا
نفسى مرة لما أنادى
تلمسي بنورك عينيا
تسرقيني من كياني
تخلقيني حد تانى
حد مش مخلوق لجرحه
حد بيعاند ظروفه
بس لو صارحك بخوفه
ضحكتك تقدر تسامحه
حد لما بتندهيله
خطوته بتسبق شفايفك
رغم حزنه و رغم ليله
لسه جوه الحلم شايفك
امتى
وحالف اني ماضحكشي
ولا تضحك عيوني ف يوم
مادام فيه طفل ف الدنيا
على صوت الرصاص بيقوم
امتى الطيور تنزل و وياها الغنا
فوق الضفاير و الوشوش مطمنة
امتى الرصاص ف ايدينا يتحول زهور
نهديها بالشوق و المحبة لبعضنا
عايشين بيخنقنا الشتا
خايفين في نفس الوقت حد يضمنا
نضحك و لما الضحكة تطلع ميته
بنحس اكتر بانكسارنا و جرحنا
واكيد مفيش و اكيد مفيش
في الدنيا نور مابينطفيش
غير حب ساكن في القلوب
وياه هيبدأ فجرنا
رغم اختلافنا و افتراقنا ف الدروب
نتلاقى فيه
علشان نكمل حلمنا
ماتقربيش
ماتسلميش روحك لأحضاني
قلبى انجرح والجرح نساني
ازاى احب و ازاى اعيش
ماتفكريش ان الغنا سابني
انا اللى سيبته لما علمني
ان الجروح مابتنتهيش
لما تجيني تقولي عايزانى
مضطر اكون المرة دى جاني
مضطر اقول ماتقربيش
وماتحلميش ان الامل بكره
هيكون نجوم تهزم ليالينا
دايماً مابين الحيرة و الذكرى
لحظة ندم تقدر تبكينا
مابقتش اصدق ضحكة تصفالي
ولا قلب جاي عشان يطمني
حاسس كأن الدنيا شايلالي
ف عينيكى حلم هيتسرق مني
السر ايه؟
لا عمره خاف و لا عمره طاطى
و كل شىء واخده ببساطه
و الناس بتسأل السر ايه
لحد امتى وازاى و ليه
فيه ناس تقول ده واد شجاع
و ناس تقول ده واد عنيد
وناس تقول بلاش صداع
مافيش كلام مجنون اكيد
وناس تقول ده قلبه داق
احلام كتيره اتكعبلت
عاش الحياة حيرة و فراق
لحد روحه ما نملت
داخل بصدره على الحياه
ولا حد قادر يكسره
طب ليه يخاف و مافيش معاه
شىء غالى ممكن يخسره
رغم اختلاف الناس عليه
الكل رافض يسمعه
سر الشجاعة اللى ف عينيه
ان الشجاعة بتوجعه
عدت سنين
عدت سنين مقدرتش انساكي
باغرق في بحر العتمة و القاكي
في كل ضحكة واخدها غصب من الحياه
و ف كل شارع كنت بامشي معاكي فيه
و ف كل فنجان قهوة باتكلم معاه
عن قلب كان بيدق علشان تسمعيه
قلبي اللي ضمك حتى وانتي بتكسريني
ماقدرش يفهم ليه ببعدك تكسريه
لترﹼجعي لحظة فراقنا و تقتليني
موضوع: كلمات البوم : آخر نقطة شمس, لجوني البوم رااااااااائع 
الإثنين سبتمبر 27, 2010 12:52 pm
